putu ardana bukian
lampahe megantung
kapacekring bucun langite
daki
saru
carik-carik lampah paglantes
kepuk kadi gambuh tanpa taksu
kenyir surya sanje
masem
ngewer ngekesang teja
ngutgutin dine
nyimbuhang peteng
peteng nyujuhang sepi
sepi muponin ening ten ngajum tej
tan keni lampah sane tuni
lampahe megantung
utawi
ulung kaered engseb surya
*sampun embas ring majalah Canang Sari. No. 18. Th VII 2005
II Somia
Galang gumilang sunaran suryane
mepidabdab
liang
tan keliput sangsaye rerodan gulem
mepidarte sujati pikayun
ening, ening, ening
sapunika kesinangguh tur keaptiap
melarapan antuk suryak
suarelangite
nyimbuhang tambe sumuyug muncratang
liang
ring tilem kesangane
obor ngabar-abar nyapuin margi
mepidarte benjangan jagate mangde galang
kul-kul metkilit sinareng kenyung
mepidarte benjangan pare janane
mangde
memargi melarapan kayun
kedulurin laksana
suryak ring pempatan agung
melarapan caru
nunggaling idep ngaskare jagat
mugi tunggil idep, kayun lan laksane
sinarengan nreptiang rage ngelantur
nyekarin galah mangde ngraris
memarge dab-dab
ten kirang kenyum rikale mendak surya
rikale nuntun caka anyar
galang gumilang langite mepidarte
somia wateking butha buthi
ngelekas dewa-dewi
trepti wyakti jagadhita ngametuang
çantih, çantih, çantih
bungkulan,
wengi ring pegrupukan 08
***********************
III ENING
Nyeled muncuk
bingine nyujuh pertiwine
Anggut-angut
Ketiben krebesan
sabehe ngeribis dab-dab ngalub
Keentenin suare
bajra lan sesayuban sumirik
Asep menyan lan majegau
Ketuntun kidung yadnya runtuh saking atine ening
Mekawitan warge sari
Ambune tipis, nyrere taru bingine
Mesape tis kedas damuh
Mengetelin rumase suci metuang çantih
Nyungkemin teja bhawa
Ring pratiwinba linggih Hyag Toh Langkir
Memebawos jangih sunarine kekeberin
Ngegol
sampian penjor, pinake
Orti
antuk suksma bhakti
Ring prabha bhawa sang hyang wenang
Nyeled muncuk bingine anggut-anggut
Kesandingin
ngelinting alon suare bajre lan sunari
Ngeringkes suksma sarire, nuntun rage mepikenoh
ening
Ngaturang
bhakti ring Basukihan, 08
********************
IV Tutur Puyung
Ade ketuturan satue, unduk tutur gumi jani
Kene satuane...
Iseng mebalih tipi, pang tau ortane tuni,
pang sing kepetengan gumi
Beh....cen pelem cen saje,
pada uyut pada caluh,
ne cerik kalah, ne gede munggah,
Babe-Babe basang cengkang,
Panjak cerik pebrere tuh
kangkang, meilih puyung
Aduh.... iseng matiang tipi,
pesu ngelimurang ati, pang tau ortane dini,
Arah.... sing di tipi sing dini,
jadme jelih care lipi,
mai nyikut kemu nyegut,
rame-rame ngorte partai,
ne
jele uber jak rame,
ne luung
kaden berung,
pemuputne gumine canting camplung,
puyung ngapung kadi
capung prungung,
buke kepung.
Ahh…. iseng bengong,
ngematiang tipi, negak dini,
ngantiang ngipi
sambilang ngantos janji,
ne sing pasti,
ne sube pulesin nyelati,
ane lakar sing tepuk kanti mati,
ulian sing ngelah
nasi.
ardana ’galang’bukian
*****************************
V Sewalapatra saking Buyan
(sane
serahina sayan ....)
Memogol di duur batu
Pitakene
Mepacek
Tan luluh ketempuk rik-rikan tis
Bayu bukit Wanagirine
Sane taler mematu, tanpe saur
Ngengsek ngaksi ring sor
Ngangsan arad I Buyan
Kelangkung
putek
Sampun duluh rase
taler tan rumase rase
dije mangkin metaken indik punike?
Sire sane jagi nyawis petakenne?
Napi mawinan Buyan sungsut kadi mangkin?
Wiakti,
Nenten preside nyaurin
Duaning,
Pitaken tur pesaur
Sane runtuh kadi damuh
katepen sunar suryane nyentak
rumaket rin rage
nenten patut metaken sira?
Nenten patut nyawis nika?
Wantah pisaja laksana,
patut
Ngwaliang swadharma I Buyan
Mangde tan memogol pitaken
ngelantur
Mangde ta mematu rase
ngelantur
dumogi
Kopi
ring buyan” 08
*******************
VI DE….NYESEL
Tindakan gumi mule amonto
Mule bebuluh idupe tuah acukcukan
Kene boye keto boye
Mai senglad kemu senglad
Mekeneh nyujuh
carang-carang rerikrikan idupe
Mule abungbung sesayutan angkihane
Cekoh-cekoh
Cekeh-cekeh misi
Ngengsur angkih-angkih
Nguber pelaib peliat kitene
Nguber pekendel
Mule abucu sesepat tindakan ne
Mai paling kemu paling
Nyongkok sikut
Nyeleg entuk
Kanti kekeh, ketug bayune
Ulian ke sebengin bucu
Lelingsen semitane
Mule akupak bayune ngangsehang
Memule budi
Ngidiang aketelan kecuh budi karma
Pang ne abuluh maang suluh
Ne
abungbung sing ngeranang buung
Ne abucu ngeranang payu
Ne akupak sing ngeranaang
nungkak
De….nyesel
Karo-bude
180707 kubutunggal
VII HALLO…PAK GEDE
Dugasne
maluan,
“Ye……tumben pak GEDE tuun mai”
Keto pesadun krimik gumine
kepingon
Wireh nembe anake GEDE
Mekenyem-kenyem
di warung Men Lutire
Warung rompok tiing
medinding tapis meraab apilan tuduh meteteh batu bate
Metali
duk
Dugasne
maluan,
“ye……tumben pak GEDE teke mai?!”
Buin keto pesadun krimik
gumine
Kepingon
Wireh nembe anake GEDE
Mesile
tiding di warung tuak Nang Somplogan
Warung megalar tiing meraab ban carang asem
Melumur
bongkol tiing
“ Men Lutir jak Pan Somplogan yen saye buin pidan menek
warungngene lakar kebenain saye, Yen.......? ? ?
Keto
dugas imaluan
Ane
jani
“ye…….dadi sing taen mai jani pak GEDE?!”
Metakon pedidi jani Men Lutir ,Nang Somplogan
teken gumi
Mesaut gumine,
“pak GEDE nak be GEDE,
metimpal jak nak GEDE-GEDE, apebuin kantong basangne GEDE sing be lakar ngalih
gae nengokin anak lacur GEDE-GEDE
Diapin pidan bibihne GEDE-GEDE lakar maang suarge ane GEDE cutetne sing ade
ape DE….!.”
Ane jani
“ye………pak GEDE adi sing nyerere….?
*********************
Bungkulan,karo anggara 170707
IX ANGGO
PEKENDEL
Dingehang munyi
sulasihe ngengkik
Doh pare sing tau wiwitan munyi
Ngengkik ngentenin angine ngangsel-angsel
Ngapulin gumine mererod peteng
Mepeed
bang ,
Jangih sunarine
nimpalin
Anggon pekendel
gumi
Nyaruang pekeweh
Ngengkebang sebet
Nesil pemunyin
jangih , uli bet tan sudi ke jamah
Ngeruntutin
geguritan gumine jani
Pelayonan campah
Mekawitan warga sari semaya
Mesayong
semu jun
Ngrimikang petenge tanpe
dingin
Dingehang
melahang Sulasih ngangsan jangih
Ngae ngundap
uyuk I Cilalongan di bingin anget
Ngisinin pekendel isin gumine
Ane
ngansan tuh - suluh
***************
X. CUH
!!!
Cuh !!
Sebilang sledet , mepunduh di bucu umahe
mebo tai bikul
Sebilang liwat, tangkahe kecosin bikul
Cuh !!
Sebilang bucu umah misi bikul
Sebilang rurung misi bikul
Minab merane carik ngelimbak
Telah
– kedas
Isin carik kerusuhin bikul
Telah isin carik, kedas tanah carik
gut-gut bikul
Cuh!!
Peliat
paling, sebilang bucu
langite peselanting
meikuh bikul
angine
ngiberang tai bikul
Cuh!!
Bikul.....bikul....bikul
Dini bikul.
Ditu
bikul
Ngamah ikuh
Ngusapin tendas
Kedas
sing mesise adaki kuku
Care
jani
Langit peselating meikuh bikul
Eeeee.........kkkk, cuh.....!
Ngemenekang pejalene
Ngangsan
mokoh bikule pecroet mecande
Ngangsan
enceh otak bikule
Ngangsan
gembrong bulune mepupur
Tanah
barak
Ngalahang cupak tanah
Uueeekk.... cuh..!
Meilehan mebo polo bikul
Hii..........
*********************
XI Mesatya Gumi
I
Gending gumi metetanduran urip
Peketel-tel karme nyujatiang pikayun
Tanpe sangkan,...
Sunar sasihe makalangan nesilan kunang-kunang
Mesesanjan
punia angin
II
Tanpe rarapan sujati ring tepin kayun
Mesurat tur nyulam pikayunan ngerinsing ning
Mepaice kembang tembang sutri
Meselonding ampehan hyang baskare
Nganyudang
rambut pertiwi
Embas kesir-sir
III
Kukus arum ngulayang layang
Ngadegin teteleb kekelik ngitehin ambare
Kadi jagat ke ayomin hyang Narayani
Ngelangkung
nreptiang koripan
Kelep sumirik ambune putih
Mererpan
nguruh satya wacana
Taler
kepatutan satyeng gumi
*****************************
XII KAGEN RING SUNYA JAGAT
ardana
bukian
Rikale sunya, kangen
titiang ring jagate
Jagat sane landuh, raharje lan rahayu
Mepaileh sampun titiang
Ngeruruh sesibuhan hening kasunyan jagat
Ical tan
kepanggih, wireh
Batu-batu kaang jagate
Benyah bebiayutan ritatkale didih-didih momo angkare
Nyusupin tur neleb,
tanpe wates
ngeluluhang
saka-saka
pengrajeg satyeng jagat
kangen titiang ring sesolahan gilik
ngegolang kampid kupu-kupu tarum jagate
mesolah
rejang langit sane wyakti
neltel-neltelang santi sane ageng
wigunanye
nyujatiang agem-agem laksana rahayu
nanging
mangkin rumase jagat titiang tan ma rah
kembang lem-lem
sekadi titiang sane leleh , puyung naanang
kangen maambuh tis kasunyan jagat
aduh....jagat titiang meurug byuta
mepangsegan , mekalung angen lan kaliput dening awidya
putek, tur memogol
sunyan jagate mangkin, mesile tiding ring muncuk
kaang
sane ngansan rered tur lapuk
ngaksi sander- sinander didih-didih ombak momo
ngelikub tan patepi tutur nyane,
ngubes tur nguber sunyane sane sampun meengsek
nesil ring prung-prung
bucun langite
ah..... titiang nedunang kangen ring kenyung bulan
sane nyerarit tipis
nyunarin jagra sunya
taler nyantos sesolahan
lan lampah jagate ma rah
*********************
XIII PINUNAS
Ardana
bukian
Kesumbung
kenyung manis dine
Tanpe
parisel-sel
Tanpe sebet ngubengin rage
Gending gumi
metembang alus
Alon
nyirsirin pikayunan luwih
Ngurati
bakti ngelutin pertiwi
Nguruh
Pertiwi rah-ayu
Rahayu,
rahayu, rahayu
Metatah kare kalih ngastiti
Dados
pemungkah pengrupakan
Pikenoh luwih nuntun,
Pebawos wyakti meduluran,
Laksane
nganutin ring
pituduh sanghyang Agama keanggen
Titi pengancan ngaturang karma ring
Hyang
Swadyaya
**************************************************************
XIV. AKEH KEPETANGAN
Wengi metangi tandang-tandang
Tanpa warah lesu
Anteng ngemargiang swadharma padha
Katepenin sunar damar langit
Keigumin solah kupu-kupu barong
Mesesanjan
Malila cita ring tepi segara
Angub ngatonang ipun mesusatya
Naging ajerih manah yaning sampun kapetengan
Genah suci pawedan hyang Baruna
Dados genah i kupu kapetengan
Tan manuting sesana becik dados jadma magama
Nunas ica
Wengi gegeson memargi
Mapeungu sweca galang
Munut kayun masunar
Ngicalang sekancan
kapetengan jadma
BUNGa KedatUan LANgit
Mei,09
**********************************************************
XV, GIRING WAWANIN
Malih titiang ngewawanin
Mapeungu , nangingiang semeton sane sampun
Me – ta – ngi
Bali kocap pulo Dewata
Sampun uning!
Bali kocap suarga nyekala
Sampun uning!
Bali kocap keanggo conto budaya lan seni
Sane ajeg ring jagate
Sampun pastika!
Bali kocap ajengan sane anget kedotang investor
...................?
bengong
Bali kocap nyenikang nyenikang kagelahang olih krama Bali
Ah.................!
bongol
Tanah Bali sampun ke sertifikatin olih anak dura
Bih................?
tan rungu
Malih titiang wawanin
Kari ajeg bali?
Ring napi?
Ring aran.....?
**************************
XVI OM SWASTYASTU
(pilpres-2009)
swastiprapta
titiang nyakupang tangan
angastungkara
nyungkemin jagate mangkin
mogi mijil, sesuluh urip becik
tan momo, tan angkara
rikalaning kocap piodal agung
duaning,
jagi ngemacikang lampah
I guru
wisesa
Om
Swastyastu, ring pemilu
mogi rahajeng,
tanpe
metuang ketel rah,
tanpe
saling ajeng ring pasemetonan
mogi lanus- sida karya
santi
jagate
BUNGa KedatUan LANgit
Mei
09
***********************************
XVII BALI PARADISE
Bengong ngatonang kawentenane
Alas , gunung, segara
ngametuang madu
Lila sang adnyana mapidabdab
tis ngametuang angub
Inggihan suarga nyelantara
kocap ring jagate maya
Pidabdab agama lan budaya
memargi antar
Anuting pemargi kawitan –
leluhur sane nguni
Raris napi sane sarat
kabuatang mangkin?
Angga, pamuus, lan parilaksana
tan matunggilan malih
Duwe jagat sami sampun ical,
sampun kapaid solah momo
Inggihan kama muang artha
mamurti tanpa teduh dharma
Sasuduk tan malih kaduduk
Egar ring sajeroning
parisolah tanpolah solah melah
BUNGa KedatUan LANgit
************ Mei 09
XVIII TAKSU
Ngiring
yatnain,
doning, jagate kadi tarune tuh..
akidik
sledet tatit,
agni pemuputnyè
yatnain,
kadi taksu rumaket ring tapel
mapaiket saling semu girang
ngeletok – seledet telek
ngawi erang manah ngatonang
tapel lan taksu mepaiket kanti
riwekas
diastun
tan bungah ka kelěs pepayasan
yatnain,
ring pasemetonan, pascat ngelarang
rumaket
i taksu tapel
ngaskara
jagat ,idup rahayu
diastun akeh kober-kober
partai ne mejajar
dharma
negara ngiring laksanayang
satya
negara ngiring gelarang
nunggal ika ngrastiti jagat
BUNGa KedatUan LANgit
Mei
09
*********************
XIX DE MILU-MILU
pemilu jalan astitiang
jalan
mekejang dadi pe-celang
apang jagate galang
galang
ulian celang
sing
ulian megarang
yen
ade nak megarang
ulian pemilu
ih....de milu.-milu,,,!!
BUNGa KedatUan LANgit
Mei
09
XX, Ten mejumu
Akeh angiber-iber ring langit baline
Sekancan warna-warni kadi hyang lalah
Ngusurin kedepan langit birune
Nanging
Yen dados
ketunas
Akehe boye je
kedadosang piranti
Ngebyuran byute
Kadi nguni
Rikalaning rauh karya agung
sane mewasta
pemilu
ring warsa siu sangangatus enamdase lima
lan siu sangangatus sangangdasa sia
Akeh warna, akeh tetujon
Dados byute tur memati-mati
Nyama, pianak,
bapa, lan braya
Mogi akeh warna kadi canang sari
Sandat, jepun, pacar galuh, gumitir, pandan arum
Mesikian ring
ulatan janur
Ngulati kayun asiki subakti
mangda rahayu
sami
BUNGa KedatUan LANgit
Des’08
****************************
Yen mewali ring rage
Ten
nyandang malih sumangsaya
Yadiastun gumi mangkin kadi puniki
BUNGa KedatUan LANgit
Des’08
****************
XXII, PAN MILU
Majeng ring Jero
Gde gumi
Akeh mangkin
kenyume manis
Manis-manis
nanging yen ngentungan kayun ke ungkur
mewaton indik
polah kenyum manis dumun
kenyume wantah ring lambe tan me
untu
sane semaya kewedar rikalaning ngentungan kenyum
pang polih pengugu kramane
akeh
sane tan maisi
sami pongpongan,
nika mawinan kenyum lambe tan meuntu
tan nyegut pisaje.
Mangkin malih akeh ngadol kenyum
Nunas pengugu, nunas restu
Pang panyu ngeruruh langu
Yenning jati-jati dados prekangge jagat
Ngiring untuin ragane ring lambe
Mangde tan dados
Singa
ompong
Galak ring raungan sakewala
mekirig yen wenten meseh
kerane tan mauntu
Sampunang dados Pan Milu ring Pemilune
Milu-milu kenyum lan ngeraos
Sakewala
tan milu-milu ring pisaje.
Ngiring sujatian
kayun, kenyung lan laksana
Ngeruruh kesujatian urip.
Tan siluet sane mepajar ring arep
krama
dumogi
(pil
caleg)
BUNGa KedatUan LANgit
Des’08
***************
XXIII. NANDUR IPIAN
ALAS
Semeng sayonge
ngerepe ngintipin
hyang baskarane
done basene
ketuludang damuh
mengetel di bungan gadunge kembang
lem-lem
ketekepin kamen
akupak tapis
Pan Reka nungkuk metimpal kopi
Anget tanpe gule
Peliatne sawang
metekin ulungan don
bingine di duur bukite
ngansan kapah
katekepin tower
ane melepah
nepes alas ngebah akah
”pe..ngidih pis
pe..” pianak Pan Reka lakar masuk
Pan Reka ngetuh nyeeng lima cenik
pianakne
Sing mesaur,
wireh iteh ngelindeng
Ngilindeng
di keneh nyeliksikin alas
Metetanduran
Base, isen, lan gamongan di beten tarune gede-gede.
” Bli... idih
pis..e, anggon mli baas..” men Reka lakar kepeken
Pan Reka sing mekijep ngusapin
pengidih kurenane
Aji ipian
Pan Reka ngelut
pianakne lan kurenane.
Keusud tur kedandan
nyliksikin alas
Metaru Tower.
Ngentungan
lampah , metetanduran base, gamongan, isen
Muah ipian
Dibeten taru tower duur bukite
Mogi
nged....nged.....nged...
ardana bukian**
Tidak ada komentar:
Posting Komentar